Бишкек, Өкмөт үйү
2001-жылдын 28-ноябрындагы N 743
КЫРГЫЗ РЕСПУБЛИКАСЫНЫН ӨКМӨТҮНҮН ЧЕЧИМИ
Товарлардын чыгарылган жерлеринин аталыштарын коргоо маселелери боюнча
(КР Өкмөтүнүн токтомунун редакциясына ылайык
2005-жылдын 12-январы N 18)
«Товардык белгилер, тейлөө белгилери жана товарлардын чыгарылган жерлеринин аталыштары жөнүндө» Кыргыз Республикасынын Мыйзамын ишке ашыруу максатында Кыргыз Республикасынын Өкмөтү токтом кылат:
1. Товарлардын өзгөчө касиеттерин, айрым сапаттарын жана башка мүнөздөмөлөрүн аныктоо жана контролдоо боюнча ыйгарым укуктар төмөнкү мамлекеттик органдарга жүктөлсүн:
Кыргыз Республикасынын Экономикалык өнүктүрүү, өнөр жай жана соода министрлиги — өндүрүштүк-техникалык багыттагы товарларга карата;
Кыргыз Республикасынын Айыл, суу чарба жана кайра иштетүү өнөр жай министрлиги — айыл чарба продукциясына карата;
Кыргыз Республикасынын Билим берүү жана маданият министрлиги — көркөм жана элдик кол өнөрчүлүк буюмдарына карата;
Кыргыз Республикасынын Экология жана өзгөчө кырдаалдар министрлиги, Кыргыз Республикасынын Өкмөтүнө караштуу Кыймылсыз мүлккө укуктарды каттоо боюнча мамлекеттик агенттик жана Кыргыз Республикасынын Өкмөтүнө караштуу Геология жана минералдык ресурстар боюнча мамлекеттик агенттиги — товарлардын, анын ичинде минералдык чийки заттан өндүрүлгөндөрдүн өзгөчө касиеттери, айрым сапаттары же башка мүнөздөмөлөрү менен байланышкан географиялык жерлерди делимитациялоо;
Кыргыз Республикасынын Саламаттык сактоо министрлигинин Дары-дармек менен камсыз кылуу жана медициналык техника департаменти — дары-дармек өсүмдүктөрүнө карата;
Кыргыз Республикасынын Саламаттык сактоо министрлиги — табигый минералдык сууларга, туздарга, дарылык баткакка карата.
(Кыргыз Республикасынын Өкмөтүнүн 2005-жылдын 12-январындагы N 18 токтомунун редакциясына ылайык)
2. Жогорудагы мамлекеттик органдарга:
— ишкердик ишти жүзөгө ашыруучу юридикалык жана жеке жактардын арыздарын кароо жана ушул токтомдун 1-пунктунда көрсөтүлгөн маселелер боюнча корутундуларды берүү боюнча комиссияларды түзсүн;
— ушул токтомдун 1-пунктунда көрсөтүлгөн маселелер боюнча корутундуларды берүү, функционалдык милдеттердин чегинде акы төлөбөстөн жүзөгө ашыруу.
3. Юридикалык жана жеке жактар тарабынан товарлардын чыгарылган жеринин аталышын каттоо ыктыярдуу негизде жүзөгө ашырылат.
4. Бул токтомдун аткарылышын контролдоо Кыргыз Республикасынын Премьер-министринин Аппаратынын социалдык-маданий өнүктүрүү бөлүмүнө жүктөлсүн.
5. Бул токтом жалпыга маалымдоо каражаттарына жарыялансын.
Кыргыз Республикасынын Премьер-министри К.Бакиев