Бүгүн, 25-апрелде Кыргызпатенттин директору Рахат Керимбаева Бүткүл дүйнөлүк интеллектуалдык менчик күнүн майрамдоого карата уюштурулган “Интеллектуалдык менчик укугу” темасындагы семинарга катышты.

Иш-чара АКШнын Коммерциялык укукту өнүктүрүү программасынын (CLDP) өкүлдөрү тарабынан уюштурулган. Семинардын максаты Кыргызстанда студенттердин, мугалимдердин жана мамлекеттик кызматкерлердин интеллектуалдык менчик укуктарын коргоо маселеси боюнча, өзгөчө технологияларды трансфертке байланыштуу потенциалын жогорулатуу болгон.

Семинарга интеллектуалдык менчик жаатындагы эксперттер, АКШнын Корнелл жана Мичиган университеттеринин профессорлору, Кыргыз Республикасынын министрликтеринин жана ведомстволорунун өкүлдөрү катышты.

Куттуктоо сөзүндө Кыргызпатенттин директору Рахат Керимбаева Кыргызстанда интеллектуалдык менчик жана инновация тармагында 13 мыйзам бар экенин айтты. Ал белгилегендей, тиешелүү жоболор Кыргыз Республикасынын Граждандык кодексинде, Кылмыш-жаза кодексинде жана Конвенциялык кодексте да камтылган.

Андан ары Кыргызпатенттин жетекчиси интеллектуалдык менчикти өнүктүрүүгө багытталган жакында кабыл алынган мыйзамдарга кеңири токтолду. Тактап айтканда, ал “Товардык белгилер жана географиялык көрсөткүчтөр жөнүндө” мыйзамга кеңири токтолду, анда жаңы “географиялык көрсөткүч” интеллектуалдык менчик объектисин киргизүү жана товардык белгини анын ээсине мамлекеттик каттоодон өткөрүү каралган.

Семинардын жүрүшүндө катышуучулар ошондой эле интеллектуалдык менчик укуктарынын, патенттердин, коммерциялык сырлардын, товардык белгилердин жана автордук укуктардын коом үчүн баалуулугу боюнча көптөгөн презентацияларды алышты.