16-декабрда Инновациялык борбордо Кыргызпатент тарабынан уюштурулган интеллектуалдык менчик укуктарын коргоо боюнча тренинг болуп өттү.
Иш-чарага укук коргоо органдарынын, «Болотов жана Партнерлор» (Казакстан) жана «Атан Консалт» юридикалык фирмаларынын өкүлдөрү, чет элдик автордук укук ээлеринин өкүлдөрү катышты.
Иш-чараны Кыргызпатенттин жетекчиси Рахат Керимбаева ачты. Ал Кыргызпатенттин жана жеке өзүнүн атынан семинардын катышуучуларына салам айтып, Бакытбек Сапаралиев өкүлү болгон «Атан Консалт» юридикалык фирмасына жана Жанат Нурмагамбетовдун атынан «Болотов жана Партнерлор» компаниясына бул иш-чараны өткөргөндүгү үчүн ыраазычылык билдирди. “Антиконтрафакт-2022” X юбилейлик эл аралык форум.
«Ар бир өлкөнүн экономикасын өнүктүрүүдөгү негизги көйгөйлөрдүн бири – өлкөнүн экономикалык коопсуздугуна олуттуу коркунуч туудурган жана инвестициялык климатты бузуучу контрафакттык жана фальсификацияланган продукцияны өндүрүү жана сатуу болуп саналат. Мамлекеттин экономикалык жоготуулары өтө чоң, анткени каракчылык жана жасалма акча көмүскө экономиканын кызыкчылыгы үчүн гана колдонулат.
Ошол эле учурда Кыргызпатент интеллектуалдык менчик укуктарын коргоо үчүн укуктук негиздерди түзүүгө жана мындай объекттерге укуктарды берүүгө компетенттүү. «Укук бузуулар жөнүндө» Кыргыз Республикасынын кодексине ылайык интеллектуалдык менчиктин объектилерине болгон укуктарды бузууга бөгөт коюу маселелери укук коргоо органдарынын да, Кыргызпатенттин да компетенциясына кирет. Кыргызпатент укук коргоо, көзөмөлдөө, сот органдарына, ошондой эле автордук укук ээлерине интеллектуалдык менчик объектилерине болгон укуктарды коргоо маселелеринде көмөк көрсөтүү боюнча тынымсыз иш жүргүзүп жаткандыгын белгилегим келет. Аракеттерди бириктирүү менен биз интеллектуалдык менчикти, ошондой эле укук ээлеринин да, керектөөчүлөрдүн да кызыкчылыктарын коргоону камсыз кылууда олуттуу прогресске жетише алабыз», — деп баса белгиледи Рахат Керимбаева.
Кыргызпатенттин директору ошондой эле мындай жолугушуулар анын катышуучуларына коңшу өлкөлөрдөн келген кесиптештердин тажрыйбасы менен таанышып, өздөрүнүн тажрыйбасын байытууга мүмкүнчүлүк түзөрүн белгиледи.
Семинардын катышуучуларына «Болотов жана Партнерлор» юридикалык компаниясынын өкүлү Жанат Нурмагамбетов интеллектуалдык менчик объектилеринин ар түрдүүлүгү, товардык белгилердин укуктарынын бузулушу жана оригиналдуу жана контрафакттык товарлардын айырмалоочу белгилери боюнча баяндама жасады.